شقرا تدوسك يامْنَفِّذْ للارهاب=وش جاب راس الشر للزايديّه
شقراعليها من الستر ثوب وحجاب=مشهورةٍ بالدين والشاذليّه
انشد وتلقى العلم في كل محراب=متمسكه با الملّه الواسطيّه
يوم الكِدَرْ يوم الحَجَرْ يوم الانشاب=يوم الِ مْجَاهَدْ فوق بنت العبيّه
صبيانها حول الموحِّد بالاسباب=اسيوفهم والمال منها هديّه
من دون منّه قدمتها والاشناب=لين الوطن اصبح بلادٍ هنيّه
اسوارها تروي بطولات الاقراب=وترابها بالدم ريحه زكيّه
ثلاث بيعاتٍ من القلب وعْذاب=مَحْدٍ سبقنا للعلوم العذيّه
نِصْرِدْ على البيعه كما صَرْدْ حرّاب=على قضاب السيف يوم الدعيّه
اسمك رفيعٍ فالثريا والاقطاب=مايقترن باهل العلوم الوطيّه
لا والذي نزّل تبارك والاحزاب=قلته وانا من عزوةٍ صالحيّه
جدّاني المقرن عريبين الانساب=اللي لهم فالمجد روحه وجيّه
تمت وصلّوا عد ما يفتح كتاب=عليك ياطه شفيع البريّه