ياحلو منشى المزن لا ثار دهشان=يضحك ويبكي مع تراقص شبوبه
ساقه ولي العرش بالخير مليان=وبله غروبٍ تزعج الما صبوبه
أسبل هماليله على الدار هتّان=يمزح ربابه مع نسايم هبوبه
في مقدمه غراً حلايا وضيحان=قعودي اللي معرّبٍ من نجوبه
تروّست ياعظمها جا لها شان=وهلّت بردها مثل وضحاً حلوبه
لكن مطرها ما مشى منه وديان=يا للعجب مبروكةٍ ومحبوبه
أثر المطر منها قرارات سلمان=تدبير راعي الكون منشي نصوبه
قطعت راس الشر من غير فهقان=هاك الصنم لحقه من الدين حوبه
الكل منا البارحه بات فرحان=إلا بني ليبرال خمّهْ كذوبه
نضرب مثل بالفاحشي ذاك قينان=تغريدته صارت عليه محسوبه
يابوفهد أرويت من كان ضميان=من شعبك المخلص أوامر عذوبه
طال الوطن يابوفهد فوق الاوطان =يامعانق القطبين مليون نوبه
شقرا تبايعكم على كتاب قرآن=عاداتها تسبق تبايع طروبه
تمت وصلوا عد مابان فجران=على الرسول أفضل صلاةٍ وجوبه