يا بيت أنا بنشدك عن راعي البيت=وشبه تغيّب ماله اليوم شوفه
قال أنت ماشفت العرب يوم مريت=كل(ن) يعزي و دمعته في كفوفه
قلت البكا لو كان بيرجع الميت=لابكيه لين العين ترجع تشوفه
مالي جدا كود الدعا لحامي البيت=يغفر لأبوي و يغمره بإمعروفه

يا قاضيً وقتك دموع و تناهيت=دنياك هذي ماعليها حسوفه
الناس تطردها سوات العفاريت=واللي طردها ما يحصل شفوفه
سوات من يطرد سبات السباريت=ولا له حصيل إلا الضما اللي بجوفه
دنيًا تغر و لا عليها تثابيت=و لا يربح إلا من عطاها كتوفه
و أبوك يا خالد كسب سمعه وصيت=شيّد بطيبه صرح كلٍ يشوفه
جعل الحيا يسقيه في كل توقيت=اللي وصوف أهل الوفا من وصوفه